جب دنیا کے ایوانوں میں ظالموں کے ساتھ سودے ہوتے ہیں، جب مظلوموں کی چیخیں عالمی میڈیا کی نظروں سے اوجھل کر دی جاتی ہیں، جب ہر طرف سے بےحسی اور خاموشی کا پہرہ ہوتا ہے، تب بھی غزہ کی سرزمین پر ایک قوم ہے جو ڈٹ کر کہتی ہے: "حسبنا اللہ ونعم الوکیل!”
غزہ ایک لہولہان سرزمین جہاں اس وقت ہزاروں معصوم بچے ماں باپ سے بچھڑ چکے ہیں، جہاں ہر روز گرتے مکانات کے ملبے تلے بےگناہ جانیں دم توڑتی ہیں۔ وہاں مائیں اپنے لختِ جگر کو مٹی کے سپرد کر کے صبر اور استقامت کی چادر اوڑھ لیتی ہیں۔ غزہ کی گلیوں میں نہ پانی ہے، نہ بجلی، نہ دوا۔ بیمار بچے تڑپ رہے ہیں۔
اقوامِ عالم کے ضمیر مردہ ہو چکے ہیں۔ برائے نام مہذب دنیا کے دارالحکومتوں میں انسانی حقوق کے بلند بانگ دعوے تو ہیں، لیکن فلسطین اور غزہ کے بچوں، بوڑھوں اور عورتوں کے حق میں کوئی آواز بلند نہیں ہوتی۔ نہ کوئی سفارتی حل، نہ کوئی انسانی امداد — صرف اور صرف تباہی اور خون۔
ہم غزہ کے ساتھ ہیں! کیونکہ وہاں کے لوگ تمام تر مظالم کے باوجود آج بھی ظالم کے سامنے سر نہیں جھکاتے۔ غزہ کی مساجد کی آذانیں گواہ ہیں کہ ایمان والے ظلم کی آندھیوں میں بھی اللہ پر توکل رکھتے ہیں۔ وہاں کے بچے پتھروں سے ٹینکوں کا مقابلہ کرتے ہیں، وہاں کی مائیں اپنے بیٹوں کو شہادت کی مبارکباد دیتی ہیں، اور وہاں کے نوجوان اپنے گھروں کے ملبے پر کھڑے ہو کر "لبیک یا اقصیٰ” کے نعرے لگاتے ہیں۔
نحن مع غزة! کیونکہ غزہ کی موجودہ صورتحال ہمیں یہ بتاتی ہے کہ ظلم کبھی دائمی نہیں ہوتا۔ چاہے کتنا ہی اسلحہ اور طاقت کا غرور ہو، ایک دن سچ غالب آتا ہے۔
ہم غزہ کے ساتھ ہیں، کیونکہ ہم دیکھ رہے ہیں کہ کیسے پورے شہر کو قید کر کے، پانی اور خوراک بند کر کے، لاکھوں لوگوں کو اجتماعی سزا دی جا رہی ہے۔ کیسے ہر روز وحشیانہ بمباری کے ذریعے معصوم بستیاں مٹائی جا رہی ہیں۔
ہم غزہ کے ساتھ ہیں…
کیونکہ امت ایک جسم ہے، اور اس کا ایک حصہ رو رہا ہے۔
کیونکہ خاموشی جرم ہے، اور مظلوم کی حمایت ایمان کی علامت۔
ہم غزہ کے ساتھ ہیں…
کیونکہ مظلوموں کیساتھ کھڑا ہونا ہمارا فرض ہے۔
کیونکہ مسجد اقصیٰ کی تقدس ہمیں پکار رہی ہیں۔
کیونکہ ظلم کے اندھیروں میں وہاں کے لوگوں کا صبر اور توکل ہمیں جھنجھوڑ رہا ہے۔
ہمارے رب نے فرمایا ہے:
"وَلَا تَحْسَبَنَّ اللّٰهَ غَافِلًا عَمَّا يَعْمَلُ الظَّالِمُونَ”
(اور تم ہرگز یہ گمان نہ کرو کہ اللہ ظالموں کے اعمال سے غافل ہے۔)
ہم غزہ کے ساتھ ہیں — اپنی دعاؤں میں، اپنی تحریروں میں، اپنے وسائل میں، اور اپنی آواز میں۔ ہم خاموش نہیں رہیں گے، کیونکہ غزہ کا ہر معصوم شہید ہمیں بیدار کر رہا ہے۔ یہ انسانیت کی بقاء کی جنگ ہے، اور ہم اس جنگ میں مظلوموں کے ساتھ ہیں۔
نحن مع غزة، نحن مع الحق، نحن مع المظلومین!
(ہم غزہ کے ساتھ ہیں، ہم حق کے ساتھ ہیں، ہم مظلوموں کے ساتھ ہیں!)
