داعش کی فکری بنیادیں
۲۔ خود ساختہ خلافت کا اعلان
داعش کی اہم فکری بنیادوں میں سے ایک، جو اس تنظیم کو بہت سی دوسری جہادی تحریکوں سے ممتاز کرتی ہے، ’’اسلامی خلافت‘‘ کے قیام کا دعویٰ اور ابوبکر البغدادی کو دنیا بھر کے مسلمانوں کے خلیفہ کے طور پر پیش کرنا ہے۔ داعش نے ۲۹ جون ۲۰۱۴ء کو باضابطہ طور پر اپنی ’’خلافت‘‘ کے قیام کا اعلان کیا اور دنیا بھر کے مسلمانوں سے مطالبہ کیا کہ وہ اس کے ہاتھ پر بیعت کریں۔ اگرچہ بظاہر اس اقدام کا تعلق نظامِ خلافت کی احیا کے لیے مسلمانوں کی دیرینہ آرزو سے تھا، لیکن عملی طور پر یہ اسلامی حکمرانی کے تصور کی ایک مکمل طور پر مسخ شدہ تعبیر پر مبنی تھا؛ ایسی تعبیر جو وسیع پیمانے پر تشدد کے جواز اور مخالفین کی تکفیر کا ذریعہ بن گئی۔
داعش کے نزدیک خلافت کوئی ایسا سیاسی نظام نہیں جو امت کی شوریٰ اور اجماع پر قائم ہو، بلکہ وہ ایسی حکومت ہے جو فوجی غلبے اور علاقوں پر قبضے کے ذریعے حاصل کی جائے۔ ان کا عقیدہ ہے کہ جو شخص کسی علاقے پر قبضہ کرکے وہاں شریعت کی اپنی پُرتشدد تعبیر کے مطابق احکام نافذ کرے، وہ شرعی طور پر جائز خلیفہ قرار پاتا ہے اور اس کی اطاعت تمام مسلمانوں پر واجب ہوجاتی ہے۔ البغدادی نے موصل کی مسجد النوری میں اپنے مشہور خطاب کے دوران یہی دعویٰ پیش کیا، خود کو امیرالمؤمنین اور رسول اللہ صلی اللہ علیہ وسلم کا خلیفہ قرار دیا اور تمام جہادی تنظیموں سے مطالبہ کیا کہ وہ اس کے ہاتھ پر بیعت کریں۔ تاہم یہ دعویٰ کئی پہلوؤں سے اسلامی خلافت کے بنیادی اصولوں سے گہرا اختلاف رکھتا ہے اور اس میں خلافت کی فقہی شرائط اور اصولوں میں سے کسی کی بھی رعایت نہیں کی گئی۔
پہلا اور سب سے اہم اعتراض ’’شوریٰ اور بیعت‘‘ کا مسئلہ ہے۔ اہلِ سنت والجماعت کے سیاسی تصور کے مطابق خلافت، شوریٰ اور اہلِ حل و عقد کی بیعت کے بغیر شرعی جواز حاصل نہیں کرسکتی۔ محض کسی محدود علاقے میں فوجی غلبہ حاصل کرلینے سے پوری امتِ مسلمہ پر شرعی خلافت ہرگز قائم نہیں ہوجاتی۔ داعش نے البغدادی کو ایسے وقت میں خلیفہ کے طور پر پیش کیا جب کسی بھی اسلامی ادارے یا علمی مجمع نے اس کی خلافت کو تسلیم نہیں کیا تھا۔ اس کی بیعت صرف داعش کے ارکان اور عراقی فوج کے ان سابق اہلکاروں نے کی تھی جو فوج کی تحلیل کے بعد بے روزگار ہوگئے تھے اور بعد میں داعش میں شامل ہوگئے تھے۔ ایسی محدود بیعت، جسے مسلمانوں کی عمومی نمائندگی حاصل نہ ہو، کسی عالمی خلافت کے شرعی جواز کی ہرگز ضمانت نہیں دے سکتی۔
دوسرا اعتراض یہ ہے کہ البغدادی خلیفہ کے لیے مقرر کردہ شرائط پر پورا نہیں اترتا تھا۔ اہلِ سنت کے فقہاء نے خلیفہ کے لیے متعدد شرائط مقرر کی ہیں، مثلاً عدالت، علم، اہلیت، شجاعت اور قریشی نسب۔ البغدادی کی علمی اہلیت کے بارے میں شیخ ابوعبداللہ محمد منصور، جو خود البغدادی کے اساتذہ میں سے تھے اور عراق کی ایک جہادی تنظیم کی قیادت بھی کرچکے تھے، اپنی کتاب میں لکھتے ہیں:
’’میں گواہی دیتا ہوں کہ وہ کمزور حافظے والا، بدخلق، جاہل اور نفسانی خواہشات کا پیروکار تھا۔‘‘
وہ مزید لکھتے ہیں کہ البغدادی کی کوئی علمی کتاب شائع نہیں ہوئی اور نہ ہی اس نے اپنی پوری زندگی میں کوئی علمی تحریر یا تصنیف چھوڑی۔
تیسرا اعتراض البغدادی کی خلافت پر امت کے اجماع کا فقدان ہے۔ کسی بھی اسلامی ملک اور کسی بھی سرکاری دینی ادارے نے البغدادی کی خلافت کو تسلیم نہیں کیا۔ مصر کی جامعہ الازہر کی مجلسِ علماء، اسلامی تعاون تنظیم کی فقہی اکیڈمی، دیگر جہادی تنظیموں اور معتبر دینی اداروں نے اس خلافت کو باطل قرار دیتے ہوئے اس کے دعوے کو بے جا اور بے بنیاد قرار دیا۔ مراکش کے عالمِ دین شیخ محمد فیزازی، داعش کے خود ساختہ خلیفہ کو عوام کی جانب سے تسلیم نہ کیے جانے اور اس کے ہاتھ پر بیعت نہ کرنے کے حوالے سے سوال اٹھاتے ہیں:
’’ایک ارب سے زائد مسلمانوں کا خلیفہ البغدادی کو آخر کس نے مقرر کیا ہے؟‘‘
وہ حضرت عمر بن خطاب رضی اللہ عنہ کے اس فرمان سے استدلال کرتے ہیں:
’’جو شخص مسلمانوں سے مشورہ کیے بغیر کسی فرد کے ہاتھ پر بیعت کرے، اس کی اطاعت لازم نہیں۔‘‘
اس بنیاد پر وہ زور دیتے ہیں کہ خلافت کا قیام اسلامی ممالک کے معتبر علماءِ اسلام کے اجماع کے ذریعے ہونا چاہیے، نہ کہ صرف طاقت اور عسکری غلبے کے ذریعے۔
قابلِ توجہ بات یہ ہے کہ داعش دوسری اسلامی جماعتوں پر تنقید کرتے ہوئے انہیں خلافت قائم نہ کرنے یا خلیفہ کے ہاتھ پر بیعت نہ کرنے کی بنا پر مرتد اور کافر قرار دیتی ہے، لیکن خود اپنی خلافت کے جواز کے لیے ’’تغلّب‘‘ (عسکری غلبے) کے فقہی نظریے سے استدلال کرتی ہے۔ یہ نظریہ فقہاء نے مخصوص حالات کے تناظر میں پیش کیا ہے، تاہم کسی ایک علاقے پر اقتدار اور غلبہ حاصل کرلینے کو پوری اسلامی دنیا پر غلبے کے مترادف یا خلافت کے قیام کے لیے ایک عمومی اصول کے طور پر کبھی تسلیم نہیں کیا گیا۔ چنانچہ داعش کا دعوائے خلافت نہ صرف اہلِ سنت کے فقہی اصولوں کی روشنی میں سنگین اعتراضات سے دوچار ہے، بلکہ مخالفین کی تکفیر اور اپنی پُرتشدد کارروائیوں کو شرعی جواز فراہم کرنے کا ذریعہ بھی بن چکا ہے۔
بعض ذرائع ابلاغ داعش کی خود ساختہ خلافت کے ڈھانچے میں بعث پارٹی کے سابق فوجی اہلکاروں کی موجودگی کی طرف اشارہ کرتے ہوئے بتاتے ہیں کہ اس خلافت کے اعلیٰ عہدوں پر متعدد ایسے افراد فائز تھے جو اس سے قبل ایک سیکولر نظام میں خدمات انجام دے چکے تھے۔ یہ حقیقت ظاہر کرتی ہے کہ داعش کی خلافت، شریعت پر مبنی نظام ہونے کے بجائے، بڑی حد تک کٹھ پتلی حکومتوں کے سیاسی ڈھانچوں سے اخذ کی گئی تھی۔
